ابدأ موقعك علي الانترنت حالا 1 | كورسور - منصة تعليمية تثقيفية عربية

ابدأ موقعك علي الانترنت حالا 1

شارك:

ازاي تبدأ موقعك علي الانترنت 1

مساء الخير عليكم جميعا 
المقالة مش طويله زي ما انت هاتتخيل ومش صعبه ، وان شاء الله هتستفاد من الشرح و من المصادر 🧡

زي ما اتفقنا فانا هاقولكم علي كل اللي اتعلمناه خلال الفتره اللي اشتغلنا فيها على موقع كورسور🥱 .. هقسم الموضوع على كذا مقالة والهدف منها انك تتعلم الآتي:

1/ ايه المقصود بالسيو وايه الفايده منه وايه الكورسات والمواقع اللي هتتعلم و تتابع معاها في الموضوع ده 🐱‍🏍 .. 
2/ ازاي تعمل مدونه علي جوجل وكل الاعتبارات بداية بالتمبلت المستخدم والودجات وارشفتها في جوجل و التقديم علي ادسنس والاشتراك في مجموعة من الخدمات الاونلاين المجانيه اللي هاتزود تفاعل الزائر معاك ( وده كله سهل بإذن الله مش صعب زي ما انت ممكن تتخيل ) 🐱‍👤..
3/ ازاي تعمل موقع ووردبريس باقل تمن ممكن وايه هي أهم البلاجنز اللي هاتستخدمها وازاي تربطه بادسنس وتأرشفه في جوجل وفي بينج .. وتقريبا نفس الخدمات الموجودة مع بلوجر لكن بطرق اسهل كتير ان شاء الله 🦸‍♂️ .. 
4/ ازاي تعمل سوق إلكتروني تعرض عليه منتجاتك ؟! ( وده هايكون موضوعه اكبر بكتير من اللي فوق وحتي ممكن يتجزأ لكذا مقالة) 💹..

ايه معنى كلمة سيو 🐱‍🏍 ؟! 

عارف الرقم اللي بيكون مكتوب تحت مربع البحث بتاع جوجل لما انت تجرب تبحث فيه عن اي حاجه ؟! ده تعداد المواقع اللي انت مش شايفها في اول النتايج 👀... اكيد سألت نفسك ايه اللي يخلي مواقع معينه تطلع في البحث كده في الأول دونا عن الباقي !؟ 
ده كله بيرجع لعلم اسمه السيو وده بإختصار عبارة عن قواعد بتحطها مواقع الارشفه وعليها بتدي الأولوية لظهور المواقع اللي بتتبع القواعد دي بحذافيرها في البداية 🚀 والباقي بالترتيب بعدهم 🚗 ..

وبرغم ان القواعد دي بيكون هدفها هو انها تصعد بالمواقع اللي عندها محتوى قوي في البداية فبالتالي تحسن تجربة الزائر لكن مش دايما بتعمل كده للاسف .. فهتلاقي فيه مواقع بتظهرلك في البداية في بعض الاوقات مش بتحتوي معلومات مفيدة مقارنة بمواقع تانية بتظهر بعدها في الترتيب وده نتيجة لنقاط تانيه بيلعبوا عليها غير المحتوي وده كله هاتتعلمه في السيو 🛸...

حرفيا بيترجم ل SEO : search engine optimization او علم تحسين محركات البحث .. والفايدة والهدف منه موحد عند كل المواقع وهو انك تحاول بقدر الامكان انك تتقدم بالموقع اللي بتشتغل عليه في محرك البحث لاول النتائج في الصفحة الاولي وده بيزود الزوار وبالتالي بيزود الأرباح الخاصة بالموقع💲 ..

امتي بتظهر وليه وازاي🤔 ؟!

بالتأكيد ظهورك هايكون مرتبط ببحث شخص عن كلمة موجوده عندك في الموقع ، وطبعا نفس الكلمة هاتكون متكررة في كل المواقع تقريبا ، وللسبب ده فانت هاتلاقي موقعك بياخد المركز الكام مليون كده بتفوق واقتدار في البداية .. فتبدأ تحاول انك تتقدم في الكلمات دي ، فهتلاقي نفسك مش هاتخلص لو قعدت تحاول انك تتقدم في كل الكلمات 😧 ...

الكلمات الدلالية :

من هنا ظهر مصطلح keywords او الكلمات المفتاحية او الكلمات الدلالية (الكلمة هنا المقصود بها جملة او سؤال وليس كلمة واحدة حرفيا ) 👌.. ودي بتكون عبارة عن سلسلة من الكلمات انت بتحددها علشان تقدر تشتغل عليها وتمسكها في جوجل وتبقي مسيطر فيها ، فمثلا لو عندك موقع عن السفر لسويسرا ✈.. فهتبدأ بتحديد كلمات دلالية معينة تقدر تمسكها تكون قليلة المنافسة عليها من المواقع التانيه القوية وفي نفس الوقت السيرش عليها يكون عالي نوعا ما .. فمثلا ممكن تكون ( ازاي اسافر سويسرا - أفضل الوجهات السياحية في سويسرا - تكلفة رحلات لسويسرا ) او كلمات من هذا القبيل ...

الكلمات اللي انت ممكن تمسكها بتتقسم لكلمات ذيلها طويل وكلمات ذيلها قصير long tail ، short tail بمعني اصح كلمات طويلة وكلمات قصيرة ... الكلمات الطويلة بتكون قليل المنافسة عليها لكن البحث عليها قليل والكلمات القصيرة بتكون البحث عليها عالي لكن المنافسة عليها عاليه جدا .. فأنت بتوازن بينهم مع الوقت🎈 ..

تحديثات مواقع الأرشفة :

قولنا فوق ان الموضوع بيخضع بشكل أساسي لقواعد بتحطها مواقع الارشفه 🔍.. وطبعا ده يخليك ملتزم طول الوقت بإنك تتابع كل التحديثات اللي بتنزل من جوجل او بينج او ياهو او ياندكس او اي موقع انت بتشتغل عليه ، للاسف من التحديثات دي اللي هايكون كويس ليك ويساعد موقعك يتقدم 👏 ومنها اللي هايخسف بموقعك الارض 🔨 وهاتقدر تتابع تأثير التحديثات دي عن طريق الاداه دي https://moz.com/mozcast/ فكل ما الرقم ارتفع كل ما الموقع اتأثر أكثر ...

المصادر : 

السيو عموما والكلمات الدلاليه والتحديثات الخاصة بجوجل وتحليل سلوك الزوار ليهم كلام كتير وشرح كتير هانقوله بإذن الله في مجالات قادمة 💫.. اما دلوقتي فأنا هاكتفي بإني اقولك علي المصادر اللي هاتتعلم منها 🎉 ..

المصادر دي ماينفعش تاخد بعضها وتتخلي عن الباقي ، لأ كلها مع بعض لانها بتكمل بعض .. 
1/ مواقع عربية هاتتابعها 🎀: سيو بالعربي ،  الرابحون
2/ الموقع ده بيوفرلك ادوات هاتساعدك كتير MOZ
3/ ده تخصص كامل من جامعة كاليفورنيا عبارة عن 6 كورسات ماينفعش انك تفوتهم بأي حال . 💎
ازاي تسجل فيه ؟! هنا في المقالة دي هتلاقي فيه كل التفاصيل اللي انت محتاجها للتسجيل في الدعم المالي وتاخد شهاده في اخر الكورس كمان تضيفها في لينكدان ، تقدر تدخل عليها من هنا 👍 ..

وطبعا تابع معانا علي جروبنا علي فيسبوك من هنا ، وتقدر تسأل في اي حاجه هاتقف معاك وهانساعدك بإذن الله .
بالتوفيق ان شاء الله ❤

No comments